في وقت الناس كلها بتدور فيه على التطوير والنجاح، بقت المؤسسات في مصر محتاجة تفكر بطريقة مختلفة علشان تواكب التغييرات. من أهم الحاجات اللي بدأت تظهر في المجال ده هي فكرة “الجدارات الوظيفية”. وده مش كلام نظري، دي حاجة ممكن فعلاً تفرق في شغل أي مؤسسة.
طيب يعني إيه “جدارات ” أصلاً؟
الجدارة ببساطه هي المهارات والسلوكيات والمعرفة اللي بيحتاجها الموظف علشان ينجح في شغله. يعني مش بس يكون حافظ الشغل، لكن كمان يكون بيعرف يتصرف صح، يتعامل كويس، يشتغل ضمن فريق، ويتطور مع الوقت.
أما “الجدارات الوظيفية”: – فهي مجموعة السمات والمؤهلات الشخصية والعلمية اللي بتمكن الموظف من تحقيق معدلات أداء عالية وقياسية تفوق معدلات الأداء العادية.
من أنواع الجدارات: –
1- جدارات عامة: دي اللي أي موظف في أي وظيفة لازم يكون عنده شوية منها:
-مهارة التواصل.
-التفكير المنطقي.
-القدرة على القيادة وحل المشكلات.
-القدرة على اتخاذ القرارات.
-الالتزام بالمواعيد.
2- جدارات فنية/تخصصية: دي بقي بتعتمد على نوع الشغل، زي مثلًا لو انت مهندس، يبقى لازم تبقى فاهم برامج الهندسة كويس. ولو محاسب، تبقى شاطر في الحسابات والبرامج المالية.
وتطبيق الجدارات ممكن يساعد المؤسسات في إيه؟
1- اختيار الناس الصح: –
كتير من المؤسسات بتعين بناء على الواسطة أو الشهادة بس، لكن مع الجدارات، الموضوع بقي أوضح. المؤسسة بتشوف إيه المهارات اللي محتاجاها، وبتدور على اللي عنده المهارات دي فعلاً.
- تقييم الموظف بعدل
بدل ما المدير يقول “أنا مش مرتاح له” أو “هو مش شاطر”، بقي فيه معايير واضحة للتقييم. الموظف عارف هو مقصّر في إيه ومحتاج يشتغل على إيه.
- تطوير الناس داخل المؤسسة: –
لما نعرف مين محتاج يتعلم إيه، نقدر ندي كل موظف تدريب على قد احتياجه. وده بيوفر وقت وفلوس، وكمان بيخلّي الناس تحس إنهم بيتطوروا.
- ترقيات ومكافآت بأمانة: –
اللي بيتعب وبيتطور بياخد حقه. مفيش مجاملات ولا ظلم. كل حاجة ماشية على أسس ومعايير.
- رفع مستوى المؤسسة: –
لما الناس داخل المؤسسة تكون شغالة بكفاءة، طبيعي الإنتاجية والجودة يعلى، وده بيخلّي المؤسسة تنافس أقوى وتحقق نجاح أكبر.
طيب وأنا كموظف، أستفيد إزاي؟
لما تفهم إيه الجدارات اللي محتاجها شغلك، تقدر تشتغل على نفسك، تطور مهاراتك، وتزود فرصك في الترقية أو حتى في إنك تلاقي شغل أحسن.
تطبيق نظام الجدارات الوظيفية في قطاع البترول المصري
التطبيق مش مجرد تطوير إداري، لكن..
-هيبقى من الأدوات المهمة اللي ها تزيد من رفع كفاءة العنصر البشري، وتحقق التميز المؤسسي، وكمان هتساعد في تنافسية القطاع على المستوى المحلي والدولي.
-هيساعد على ربط أهداف التنمية المستدامة في قطاع الطاقة مع خطط التطوير البشري.
– وكمان هيساهم تطبيق الجدارات الوظيفية في إعداد كوادر وطنية مؤهلة تكون قادرة على قيادة القطاع في المستقبل، وخاصة في ظل التوسع في الاكتشافات البترولية والغازية.
يعني في الآخر تطبيق الجدارات الوظيفية في المؤسسات مش رفاهية، ده أساس لأي مؤسسة عايزة تنجح وتستمر. لازم نغيّر الطريقة اللي بنشتغل بيها ونبدأ نعتمد على الكفاءة والمهارات، مش على العلاقات أو الأقدميات بس، الجدارات الوظيفية بقت زي “البوصلة” اللي بتوجّه الناس في شغلهم. مش كفاية تبقى شاطر في تخصصك، لازم كمان تبقى عارف تتعامل صح، تطور نفسك، وتشتغل بروح الفريق. وده كله بيساعدك تكبر وتتقدّم في شغلك علشان كده خليك متأكد من إن العبارة في الجدارة.
